شلون تختبر العطر بشكل صحيح قبل ماتشتريه ؟

هواية مرات يعجبنا عطر بالمحل نشتريه ورة مرة مرتين من الاستعمال مانحبه ونحسه مو هو هذا العطر اللي اختاريناه , السبب مو العطر تغير , بس الخلل بطريقة  تذوقنا واختبارنا للعطر.

العطر مو مجرد رشة وعطر طيب , العطر مراحل تختلف وية الوقت ومن جلد لجلد ثاني.

راح انطيكم كم نصيحة حتى تعرفون تختارون عطركم صح:

اول نصيحة, لاتختبر او تشم اكثر من 3 عطور بالمرة الوحدة, الخشم يتعب بسرعة وبعد ميميز ورة ثالث عطر, لازم تكون اكو استراحة بين عطر والثاني .

مبدئياً نبدي تذوق العطر بالورق قبل الجلد حتى نعرف الانطباع العام للعطر ونستبعد العطور اللي مراح نحبها بس مو هنا قرار الشراء.

التجربة الصحيحة تكون على الجلد , العطر يتفاعل وية حرارة وكيمياء الجسم , رش العطر على المعصم بدون فرك المعصمين , واترك العطر يتطور من وحده ...

انتظر العطر يمر بمراحله كلها (3 مراحل)

اول مرحلة هي اول ريحة راح تشتمها من ترش العطر ونسميها (top note) افتتاحية العطر -  تاخذ 10 - 15 دقيقة ... بعد فترة 30 - 60 دقيقة يبدي ينضج العطر ونشتم (heart note) قلب العطر وهنا يطلع طابع العطر الحقيقي

اما قاعدة العطر (base note) راح تظهر بعد من 3_6 ساعات بعد مايستقر العطر وهاي هي الريحة الثابتة للعطر اللي راح تدوم وياك.

لا تحكم على العطر من رشة وحدة بس , يفضل تجربه اكثر من مرة وتروح حتى تاخذ فكرة صحيحة عن كل الطبقات الموجودة بيه.

شم القهوة بين العطور من الاخطاء الشائعة, الصحيح هو شم الهواء النقي لأعادة التوازن للانف وبالنهاية العطر اللي تختار ترتديه بنهارك او يومك لازم يكون عطر انت حابه وهاويه مو عطر اشتريته من شمة بس.

وانتو شلون تختبرون عطوركم؟

• Write an answer
• Write an answer