عطور المدخنين

Dhuha Ahmed
Feb 25
2 min read

التدخين يترك اثر ورائحة قوية على الملابس واليدين ولذلك الاشخاص المدخنين يحتاجون عطور تختلف عن عطور الاشخاص اللي مايدخنون, وهالشي مو علمود نخفي ريحة الدخان, بالعكس عطور المدخنين تمتزج وية ريحة الدخان بطريقة تنطيك عطر جداً انيق وتترك انطباع عند المقابل ماينسي, ولذلك عطر المدخن لازم يكون عطر شرقي بأمتياز وثقيل نوعاً ما ,يفضل انو يكون يحتوي على وحدة او اكثر من النوتات الشرقية مثل العنبر, المسك, العود وممكن لمسة دافية من الفانيلا اللي امتزاجها وية ريحة الدخان تنطي طابع كلش فخم وقوي للمدخن, الخشب كذلك من النوتات المحببة للدخان.

عطر المدخن يفضل انو تكون قاعدته العطرية تحتوي على الباتشولي اللي ينطي ثبات للعطر اكثر , البنزوين او الامبروكسان اللي هي احد المشتقات النفطية بالعطور تنطي طابع فخم بالذات اذا وياها لمحة عود , اختيار العطر للمدخن مو رفاهية ,جزء من هويته واناقته وحضوره بالمكان.

اما للناس اللي متحب العطور الشرقية الثقيلة ممكن تستخدم العطور اللي مقدمتها حامضية مثل البرغموت والليمون وتكون قاعدتها قوية راح تتفاعل بطريقة كلش حلوة ولطيفة مع الدخان وتنطي عطر جميل بدون ماتخفي ريحته, النوتات السبايسي مثل القرفة والقرنفل تتفاعل بطريقة انيقة مع الدخان ايضاً.

العطور الجلدية او الحيوانية تكون مزوجة مع عنبر تنطي فخامة ورجولة للشخص المدخن.

مااخفيكم سر بهذا يومنا للنساء ايضاً حصة في عطور المدخنين , المرأة المدخنة يفضل ان ترتدي عطر سويتي ثقيل يحتوي على وحدة او اكثر من هاي النوتات مثل التوت الاسود , المسك , الفانيلا , التبغ , الجلد ,التوابل والبخور.

يفضل انو المدخن يختار عطور تركيزها عالي مثل EDP او PERFUME حتى تكون ثباتيتها اكثر وفوحانها اقوى , وبالتالي من تكون شخص مدخن مو شرط تكون ريحتك دخان ممكن تستغل هالشي وتكون ريحتك مميزة ممزوجة بريحة الدخان راح تنطيك جاذبية وشخصية تختلف عن اي شخص كان.