منو عطاريستا

اني فتاة عراقية اسكن في بغداد واعمل بمجال طب الاسنان ومجالي بعيد كل البعد عن العطور بس من زمان تستهويني العطور واعتبر نفسي هاوية عطور ، العطور بالنسبة الي مو شي اضافي ، هي شي اساسي تعكس هوية الشخص ومزاجه وتقلباته العاطفية وتعبر عنه وعن حضوره بالمكان.

وهنا اكيد دتتسائلون انو اني طبيبة اسنان ليش دااحجيلكم عن العطور جايتكم بالتفاصيل، قبل 3 اشهرتقريباً واجهت مشاكل صحية تخص شغلي كطبيبة اسنان ف كعدت بيني وبين نفسي افكرشنو ممكن اسوي غير شغلي بالطب، اجتني الفكرة لمعت بعقلي مثل الخيال وكلت ليش مااسوي مدونة احجي واشرح بيها الشي اللي اني احبه ويستهويني واعرف اعبر عنه، اخذت يومين تفكير شلون راح ابدي المن استشير ومنو ممكن يوجهني صح كبداية لهيج طريق.

اول من خطر ببالي هوالصديق استاذ غياث لأن اني اعرف هو الشخص اللي راح يصقل الفكرة ويطلعها بأحلى صورة ، اتصلت بيه وحددت موعد جلسة استشارية ، رحتله واني شعلة حماس بحيث اني اسولفله والشرارة تطلع من عيوني من كمية الحماس اللي يعتريني وبعد ساعات من النقاش والحماس والتفاصيل الهواية جانت جلسة مثمرة جداً، درست الموضوع صح وفكرت بالنقاش اللي صار ومن بعد هالجلسة كدرت اخذ القرار، وبدينا نخلي خطة نمشي عليها ونرتب اول درجة بالطريق، اول خطوة جانت انو انتقل من هاوية الى محترفة عطور عن طريق تطوير حاسة الشم عندي تجاه العطور ومكوناتها، وكالعادة بداية اي شي بالدنيا لازم نواجه صعوبات، شم وتحليل اكثر من 20 عطر باليوم جان بالنسبة الي تحدي خصوصاً انو اني انسانة ابداً يومها مو فارغ بالعكس مستمرة بشغلي بطب الاسنان وهواية عندي مسؤوليات بحياتي ووية هذا كله تغييرات الجو اثرت علية وتمرضت انفلونزا وهالشي اخرني شوية عن الوقت اللي حددناه بس كدرت اكملها، وخلي اكللكم سر بيناتنا، اول مانصحني استاذ غياث بهالخطوة ماجنت كلش مقتنعة انو راح تفيدني، شوية انغريت بنفسي بس بعد ماكملت شفت فرق كلش جبير بتمييزي للعطور ومكوناتها بديت اعرف نوتات مجنت اكدر اتحسسها مثل الفلفل الاسود، البرغموت وغيرها هواية، وعلى اساس هالخطوة بديت اتعمق اكثر وادرس تاريخ العطور من الصفر شلون بدت ووين وصلت لهذا يومنا واكيد القصة ماخلصت لهنا ، هاي بس البداية ...

وهسه انتو كلولي شلون علاقتكم ويه العطور وحابين هيج نوع من المدونات بالعراق؟

• Write an answer